Chichukura bisini kwcharo Radhamohan Thakur Debbarma Agulini Krishnanagaro achaikha. Bo achaimani bisi tal tai sal sawi mannai kebo kwrwi. Bo thwijamani sal simi sawi manjakha – ingraji 1910 bisini july talni chisa sal.
Sinimung Radhamohan ni
Radhamohan ni langma jora thagwino mwlang chathothok tai uanamasingsa kothoma hai. Bini chuchu (buphani bupha) buphano kami mulukni tubuwi bwsajwkbai kai-wi nogo chamari tisawi tonphaijakha. Bupha Agulio bwkarani nogo chamari kawi tongjaphano bubagrani sebuksa samung manjakha. Bini samung wngkha Reangrogni thanini tatam thumui tubuwi bubagrani rangkhogo joma rwphainani. A samungni bagwi bo uram-uram hachuk hathai mulukrogo mathangjao. Ahaikheno bo uaisa hachuk hathai mulugo thangwi bimar manjakjakha, tai aroni nogo phirogwi phaiwi thwiwi thangjalaha. Radhamohanni bupha ahaikhe thwimani sal kisaswk ulono bumabo thwiwi thangjalaha. Aphuru Radhamohan Thakurni umor bisi chiswk. A jorao nukhung chinwi Thakur nukhung (baro ghoira Thakur) hinwi bubagra bai gosijak. Radhamohan Thakurni bumama Ramgobinda Thakurbo a Thakur nukhungnino khoroksa. bwsa-bwtwi kwrwi Ramgobinda Thakur Radhamohan-no sakni bwsa baikheno pusijakha.
Cheraiphuru Radhamohan Thakur bumama bai bubagwra nogo thang-phai khwlaijao. Aphuruno bini uansukphano, tong-kwchang tongmung tai tongham raidarog bubagwra Birchandra Manikyani mokolo kalaikha. Cheraiphuru bo belai dukhuni bisingtwino pora-lekha phwrwngjakha. Ulo bubagwra Birchandra Manikyani hamjakmung manjak Radhamohan bubagwranogo bubagwra-swlasong bai tongwi pora-lekha khwlainani sep manjakha. Tai a sep manwi bo baithangno suna-kwrwi elem gwnang tai samung-kwrwng khwlaiwi songsawi tisajakha.